ഗ്രീസ്മാനെ അടുപ്പിക്കാതെ മെസ്സിയും സുവാരസും; ബാഴ്സ ആശങ്കയിൽ

ലോകത്ത് ഏറ്റവും കൂടുതൽ ആരാധകരുള്ള ഫുട്ബോൾ ക്ലബുകളിൽ ഒന്നായ ബാഴ്സലോണയ്ക്ക് അത്രനല്ല തുടക്കമല്ല ഈ സീസണിൽ കിട്ടിയിരിക്കുന്നത്. സ്പാനിഷ് ലീഗി...

ലോകത്ത് ഏറ്റവും കൂടുതൽ ആരാധകരുള്ള ഫുട്ബോൾ ക്ലബുകളിൽ ഒന്നായ ബാഴ്സലോണയ്ക്ക് അത്രനല്ല തുടക്കമല്ല ഈ സീസണിൽ കിട്ടിയിരിക്കുന്നത്. സ്പാനിഷ് ലീഗിലെ ഏഴ് കളിയിൽ രണ്ടെണ്ണം തോറ്റ ബാഴ്സ 13 പോയിന്റുമായി നാലാം സ്ഥാനത്താണ്. ചാന്പ്യൻസ്  ലീഗിലാവട്ടെ ഒരു സമനിലയും ഒരുജയവുമാണ് അക്കൌണ്ടിലുള്ളത്. ഇന്റർ മിലാനെതിരായ ചാന്പ്യൻസ് ലീഗ് ജയം ബാഴ്സയ്ക്ക് ആശ്വാസം നൽകുന്നതാണെങ്കിലും പിന്നാന്പുറത്ത് പ്രശ്നങ്ങളുടെ നടുവിലാണ് കാറ്റലൻ ക്ലബ്.

സൂപ്പർ താരം ലയണൽ മെസ്സിയുടെ പരുക്ക് തന്നെയായിരുന്നു തുടക്കത്തിൽ ടീമിനെ അലട്ടിയത്. മെസ്സി പുറത്തിരുന്നപ്പോൾ ബാഴ്സയുടെ താളംതെറ്റി. ഇതോടെ ആരാധകർ കോച്ച് ഏണസ്റ്റോ വെൽവെർദേയെ പുറത്താക്കണമെന്ന ആവശ്യവുമായി രംഗത്തെത്തി. ഇന്ററിനെതിരായ മത്സരത്തിൽ രണ്ടാംപകുതിക്ക് മുൻപ് കോച്ചിനെ പുറത്താക്കണമെന്ന മുറവിളിയാണ് ആരാധകർ നടത്തിയത്. സുവാരസിന്റെ രണ്ടുഗോളിലൂടെ ജയം സ്വന്തമാക്കിയതോടെ ആരാധകരെ തണുപ്പിക്കാനായെങ്കിലും താരങ്ങൾക്കിടയിലെ ചൂടും പുകയും തുടരുകയാണ്.

ഈ സീസണിൽ ടീമിലെത്തിയ അന്റോയ്ൻ ഗ്രീസ്മാനുമായുള്ള മെസ്സിയുടെ അകൽച്ചയാണ് ഇതിൽ പ്രധാനം. കഴിഞ്ഞ സീസണിൽതന്നെ ഗ്രീസ്മാനെ ടീമിലെടുക്കാൻ ബാഴ്സ ശ്രമിച്ചപ്പോൾ മെസ്സി വിയോജിപ്പ് അറിയിച്ചിരുന്നു.നെയ്മറെ ടീമിലെത്തിക്കണം എന്നായിരുന്നു മെസ്സിയുടെ ആഗ്രഹം. ഇത് ടീം മാനേജ്മെന്റിനെ അറിയിക്കുകയും ചെയ്തു. എന്നാൽ ഗ്രീസ്മാനെ കാംപ് നൌവിൽ എത്തിച്ച ബാഴ്സയ്ക്ക് നെയ്മറുമായി കരാറിൽ എത്താനായില്ല. ഇതിൽ മെസ്സി ഇപ്പോഴും രോഷാകുലനാണ്. ഇതിന്റെ തുടർച്ചയായണ് ഗ്രീസ്മാനുമായുള്ള അകൽച്ച. ഗ്രീസ്മാനുമായുള്ള ബന്ധത്തെപ്പറ്റിചോദിച്ചപ്പോൾ , അത് വിശദീകരിക്കാനില്ല എന്നായിരുന്നു മെസ്സിയുടെ മറുപടി.

സംശയങ്ങൾക്ക് ഇടനൽകി മെസ്സിയുടെ വ്യക്തതയില്ലാത്ത മറുപടി അഭ്യൂഹങ്ങൾ പരത്തിയതിന് പിന്നാലെയാണ് ഇപ്പോൾ കളിത്തട്ടിലെ കണക്കുകൾ പുറത്തുവന്നിരിക്കുന്നത്. ഗ്രീസ്മാനോടുള്ള മെസ്സിയുടെ അനിഷ്ടം കളിക്കളത്തിലും പ്രകടമാണ്. ഇന്ററിനെതിരായ മത്സരത്തിൽ ഗ്രീസ്മാന് ഏറ്റവും കുറച്ച് പന്ത് പാസ് ചെയ്ത താരം മെസ്സിയാണ്. രണ്ടേരണ്ടു തവണ മാത്രം. ഗ്രീസ്മാൻ മെസ്സിക്ക് പന്തുനൽകിയത് മൂന്നുതവണയും. എന്നാൽ അറുപത്തിയാറാം മിനിറ്റിൽ പകരക്കാരനായി എത്തിയ ഒസ്മാൻ ഡെംബലേയ്ക്കുപോലും മെസ്സി ധാരാളം പാസുകൾ കൈമാറിയിട്ടുണ്ട്.

മെസ്സി മാത്രമല്ല, ലൂയിസ് സുവരാസും ഇതേ അകൽച്ച ഗ്രീസ്മാനോട് കാണിക്കുന്നുണ്ടെന്ന് വ്യക്തമാക്കുന്നതാണ് കണക്കുകൾ. സുവരാസും ഏറ്റവും കുറച്ച് പാസുകൾ നൽകിയിട്ടുള്ളത് ഗ്രീസ്മാനാണ്. ഇക്കുറി ലാ ലീഗ കിരീടം നിലനിർത്തുന്നതിനൊപ്പം ചാന്പ്യൻസ് ലീഗ് കിരീടം വീണ്ടെടുക്കുമെന്ന് പ്രഖ്യാപിച്ച് ഇറങ്ങിയ ബാഴ്സലോണയ്ക്ക് ടീമിലെ പടലപ്പിണക്കങ്ങൾ നൽകുന്ന തിരിച്ചടികൾ ചില്ലറയല്ല. താരങ്ങൾക്കിടയിലെ ഈ പ്രശ്നങ്ങൾ പരിഹരിച്ചില്ലെങ്കിൽ ബാഴ്സയെ കാത്തിരിക്കുന്നത് വൻ തിരിച്ചടിയായിരിക്കും.