ഹലാക്കിൻറെ അവുലങ്കഞ്ഞിക്ക് തീരുമാനമായപ്പോൾ ബാക്കിയായത്

സഫറാസ് അലി എല്ലാരും പോയി. കപ്പ് ഫ്രഞ്ച് താടീം വെച്ച് ചൊങ്കനായി. 'മോൻ'ഡ്രിച്ചിനെ എം'ബാപ്പ' പൊറത്താക്കിയതോടെ കാർന്നമ്മാരെ...

സഫറാസ് അലി
എല്ലാരും പോയി. കപ്പ് ഫ്രഞ്ച് താടീം വെച്ച് ചൊങ്കനായി. 'മോൻ'ഡ്രിച്ചിനെ എം'ബാപ്പ' പൊറത്താക്കിയതോടെ കാർന്നമ്മാരെ ജയിപ്പിച്ച് പൊര പിന്നേം പാരമ്പര്യം കാത്തു. ആയിരം മാസങ്ങളേക്കാൾ പ്രതിഫലമുള്ള, പുണ്യങ്ങളുടെ പൂക്കാലമായ വിശുദ്ധ ഫുട്ബോൾ രാവുകളിലെ സുജൂദുകൾ സിറാത്ത് പാലമേറി. നാലു വർഷം അവ ജന്നത്തുൽ ഫിർദൗസിൽ വിശ്രമം കൊള്ളട്ടെ...

അസ്സലാമു അലെക്കും യാ ഷഹ്റുറഷ്യ.

കണ്ട കപ്പുകളിലെ കേമനായിരുന്നു ഇന്നലെ സലാമത്തായത്. നിസ്സാരരും അസാധ്യ പ്രഹര ശേഷിയുടെ വെടിയുപ്പു നിറച്ച് മൊഹബത്തേറി. സൗദി, ഈജിപ്ത്, മൊറോക്കോ, ടുണീഷ്യ, നൈജീരിയ, ഐസ്ലാന്റ്, സെർബിയ, സെനഗൽ... ന്റമ്മോ, ഒടുക്കത്തെ ഉസാറായിരുന്നു. ബർലിൻ മതിൽ തകർത്ത കൊറിയൻ ത്രില്ലർ ഡുക്ക് പടം പോലെ മാരകം. സാമ്രാജ്യത്വത്തെ വിറപ്പിച്ച് വീർ ഷഹീദായ വമ്പുറ്റ കൊളംബിയ സങ്കടത്തുള്ളിയായി. ബെൽജിയത്തിന്റെ എഞ്ചിനെ മറികടക്കുന്ന ജപ്പാൻ ടെക്ക്നോളജി കപ്പലു മയ്യത്തു. ബദർക്കളത്തിലെ ദുൽഫുഖാർ കണക്ക് മൂർഛചിന്നി സ്വീഡൻ. വൈകാരികതകൊണ്ട് ക്രൊയേഷ്യ അർജന്റീനയായപ്പോൾ ബെൽജിയം അഹങ്കാരം കൊണ്ട് ബ്രസീലായി.

മോഡ്രിച്ച്, ഹസാർഡ്, ഹാരി കെയ്ൻ, എംബാപ്പെ, പോഗ്ബ , ലൂക്കാക്കു... അങ്ങനെ പലരുമവതരിച്ച ഈ ചുവന്ന മണ്ണിൽ എനിക്കൊരു താരം മാത്രം, ഫ്രഞ്ച് ടെർമിനേറ്റർ അൻഡോയൻ ഗ്രീസ്മാൻ. കാലോണ്ടുള്ള ഓന്റെ കറാമത്തുകൾ വിവരിക്കാൻ ഇന്നു ഭാഷയപൂർണമിങ്ങഹോ വന്നുപോം പിഴയുമർത്ഥശങ്കയാൽ! ലോക ഫുട്ബോളിൽ ഓനിനി ചുട്ട കോയീനെ പറപ്പിക്കും!!

സഫറാസ് അലി

ഖൽബീ തറച്ച കളി ക്രൊയേഷ്യയും റഷ്യയും തമ്മിലുള്ള ക്വാർട്ടർ, ട്വിസ്റ്റോട് ട്വിസ്റ്റോരം. മിസ് ചെയ്ത കളിക്കാരൻ ഡിബാല. അയാളിറങ്ങിയിരുന്നെങ്കിൽ എന്ന് ദുആയിലായ നേരങ്ങൾ. ചെള്ളക്കിട്ട് പെരുക്കണമെന്ന് തോന്നിയത് അർജന്റീനിയൻ കോച്ച് സാമ്പോളിയെ. മഹാ ബോറനാണയാൾ, ഹലാക്കിന്റെ അവുലുങ്കഞ്ഞിയും. ദേഷ്യം തോന്നിയത് നെയ്മറോട്, അവനാണ് നുമ്മ പറഞ്ഞ നടൻ.

കവിത പണ്ടേ വീക്ക്നസാണല്ലോ, അർജന്റീന ചങ്കിടിപ്പാണല്ലോ,  മെസ്സി മിശിഹയാണല്ലോ, ഡി മരിയ മാലാഖയാണല്ലോ, നിയ്യത്ത് വാമോസാണല്ലോ... ആ ചക്രവാളം അസ്തമിച്ചപ്പോൾ സങ്കടപ്പെട്ടു. എങ്കിലും റൊസാരിയൊ തെരുവുകൾ പൂക്കുമെന്നും അജ്ഞാത ദ്വീപിലെ അരയന്നങ്ങളേയും തിരമാലകളേയും അവർ ദൂതിനയക്കുമെന്നും രണ്ടരപ്പതിറ്റാണ്ട് പ്രായമുള്ള സ്വപ്നം ഖിയാമത്ത് നാള് വരെ കൊണ്ടു നടക്കാൻ തയ്യാറാണ്, അതോണ്ട് നിരാശയില്ല.

കളി പോലെ ഹരമായി എഫ് ബി തള്ളലുകൾ. വാക്പോരുകൾ. അത്രമേൽ അടുപ്പം തോന്നിയവരോട് മാത്രമായുള്ള ബഡായി പറച്ചിലുകൾ..ഖത്തർ നിങ്ങളെ സ്വാഗതം ചെയ്യുന്നു. ഒപ്പം, റഷ്യയിൽ നെഞ്ചിലൊരു ബല്ലേബല്ലേയായ രണ്ടു ചിത്രങ്ങൾ താഴെ ചേർക്കുന്നു.
വാമോസ്